قارداشليق يولداشليق ادبي باريش– بولود قاراچورلو (سهند)

کیتاب یاپماغا فورصتیم اولماماق اوءچون واخت اولاندا تکجه بیر شعر یا بیر یازی سیزه گؤندرمک ایسته ییرم. بو بیرینجی سی. جنوبی آذربایجانین بؤیوک شاعیری بولود قاراچورلو (سهند)دن بیر شعر:

من دئميرم اوءستون نيژاددانام من

دئميرم ائللريم ائللردن باشدير

منيم مسليكيمده، منيم يولومدا

ميلّت لر هامي سي دوستدور، قارداشدير

چاپماق ايسته ميرم من هئچ ميلّتين

نه ديلين، نه يوردون، نه ده امگين

تحقير ائله ميرم، هده له ميرم

كئچميشين، ايندي سين، يا گله جگين

من آييرميرام، آيري سالميرام

قارداشي، قارداشدان، آروادي اردن

آناني بالادان، اتي ديرناقدان

اوءرگي اوءركدن، قانادي پردن

پوزماق ايسته ميرم من بيرليك لري

اينسانليق بيرليگي ايدياليمدير

قارداشليق، يولداشليق، ادبي باريش

دونيادا ان بؤيوك آرزي لاريمدير

آنجاق، بير سؤزوم وار من ده اينسانام

ديليم وار خالقيم وار، يوردوم، يووام وار

يئردن چيخماميشام گؤبلك كيمي

آدامام، حاقّيم وار، ائليم، اوبام وار

قول يارانماميشام ياراناندا من

هئچ كسه اولمارام، نه قول، نه اسير

قورتولوش عصري دير اينسانا بو عصر

اسير اولانلار دا بوخوون كسير