خورشید بانو ناتوان – شعرلری
خورشید بانو ناتوان – شعرلری
خورشيد بانو ناتوان کيم ايدي؟
خورشيد بانو ناتوان، آذربايجانين گؤرکملي شاعيره قاديني، قاراباغين سونونجو حاکيمي، «مهدي قولو خان جوانشيرين» قيزي، «ابراهيم خليل خانين» نوه سي دير. 6 آوقوست 1832-ده شوشادا آنادان اولدو و 2 اوکتيابر 1897-ده همين شهرده وفات ائتدي.
مهدي قولوخان قيزينا اؤز آناسي «خورشيد بانو»نون آديني وئرميشدي. او اؤز عاييله سينين بيرجه اؤلادي اولدوغو اوءچون اونا عاييله ده «دورّ- يئكتا» دئييلرميش و خالق آراسيندا «خان قيزي» آديندا چاغيريليرميش.
خورشيد بانو پارلاق ايستعدادا و قاباقجيل ايدئالارا ماليك اولان شخصيّت اولموشدور. او، آذربايجان مدنيّتينده و ايجتيماعي حياتيندا درين ايزلر قويموشدور.بو فِنومِنين مئيدانا گلمه سينين بير نئچه اساس سببي واردير. بونلاردان بيريسي شاعيره نين سوي كؤكودور. يعني ناتواندا ايكي بؤيوك نسلين – جوانشيرلرين و زياد اوغلو قاجارلارين قاني واردير. آدلاريني چكديگيميز بو ايكي بؤيوك و شرفلي نسلين هر بيريسي دونيادا بير سيرا شاعير گتيرميشدير.
ناتوانين فيطري ايستعدادينين اوءزه چيخماسي و چيچكلنمه سينين باشقا بير سببي، شوبهه سيز، شوشانين تكرار ائديلمز ياراديجي آب-هاواسي و موحيطي ده اولموشدور.
ايلك شعرلريني 50-جي ايللرده شرقين عنعنوي مؤضوعلاري ايله باشلاميشدي؛ غزللرينده محبّت و طبيعت گؤزلليكلري ترنّوم اولونور. 16 ياشلي اوغلونون اؤلوموندن سونرا ناتوان بدبين روحلو شعرلر يازميشدي.
گنج شاعيره شوشانين بير عيدّه شاعيره لري نين ايسته ديگينه گؤره اورادا «مجليس- اونس» ادبي مجليسي تشكيل ائدير. بو مجليسين رهبرليگي و اونون بوءتون خرجيني خورشيدبانو اؤز اوءزرينه گؤتورموشدو. مير محسن نوّاب قاراباغي نين رهبرليگي ايله «مجليس- فراموشان» آدلي داها بير پوئتيك مجليس ده فعاليّت گؤستريردي. محض بو زامان خورشيد بانو (شاعيره اؤز ننه سينين آديني داشييردي) «ناتوان» تخلّوصونو اؤزونه گؤتورموشدو.
ناتوانين پوئزياسي آذربايجان خواننده لريني ده روحلانديرير. بؤيوك صنعتكاريميز سئييد شوشينسكي نين ناتوان حاقّيندا خاطيره سينده قئيد اولونور كي، او شاعيره نين غزللريني سگاه اوءستونده اوخويارميش (نظامي آدينا آذربايجان ادبيّاتي موزئيي نين فوندو) و اوندان بري دئمك اولار كي بو گوءنه كيمي تانينميش آذربايجان خواننده لري شاعيره نين غزللريني اوخويوب ايلهام آليرلار.
خورشيدبانو ناتوان 1897-جي ايل 1 اوكتيابردا وفات ائتميشدي و آغدامين «عيمارت» قبريستانليغيندا دفن اولونموشدور. آدينا كوءچه، كلوب، كيتابخانا و مكتب واردير. خان قيزي نين ال يازمالاري، شخصي گئييم و اشيالاري نادير اكسپونات كيمي آذربايجان آرخيو و موزئيلرينده ساخلانيلير. باكي دا هئيكلي قويولموشدور.
چاپ اولونان اثرلري:
سئچيلميش اثرلري، تبريز: 1991؛ 112 ص.
اثرلري، باكي: ليدر نشريّاتي، 2004؛ 87 ص.
اثرلري، باكي: يازيچي، 1984؛ 100 ص.
33 غزل، باكي: گنجليك، 1981؛ 36 ص.
شعرلر، باكي: آذرنشر، 1965؛ 80 ص.
حاقّيندا اولان ادبيّات:
جعفرزاده ا. ناتوان حاقّيندا حكايه لر. باكي: آذرنشر، 1963، 60 ص.
خورشيدبانو ناتوان، آذربايجان يازيچي لارينين حياتيندان دقيقه لر. باكي: 1979، صص 44-48
محمّدوو ب. خورشيدبانو ناتوان. باكي: يازيچي، 1983، 158 ص.
ناتوانين شاعير قوهوملاري. باكي: آذرنشر، 1989، 84 ص.
عليئوا هـ. ناتوانين تيكمه لري. «قوبوستان». 1970، ن 1، صص 42-46
افنديئو اي. خورشيدبانو ناتوان. «آذربايجان»، 1985، ن 11، صص 22-65
محمّدوو ب. خورشيدبانويا. «اولدوز»، 1995، ن 1، صص 36
بو مقاله آذربايجانجا ويكي پديادا خورشيدبانو حاقّيندا اولان مقاله نين بير نئچه بؤلومودور. بو مقاله ني تكميل اوخوماق اوءچون بو سايتا موراجيعه ائده بيلرسينيز.
کیتابین موشخّصاتی:
کیتابین آدی: خورشید بانو ناتوان شعرلری
شاعیر: خورشید بانو ناتوان
تایپ: ی. ف.
فورمت: PDF
صفحه لر تعدادی: 39
سایز: 288 کیلوبایت
خورشید بانو ناتوانین شعرلریندن بیر نومونه:
فيريشته طلعت و مه روي و خوش ليقا، گئتمه
جمالي قلبيمه داييم وئرن ضيا، گئتمه
مسيح تک، نفسي مورده ني ائدن احيا
دهاني ايچره اولان چشمه-ي بقا گئتمه
اسير- دانه اولوب، دام- زوءلفه دوءشدو کؤنول
او نؤع سيلسيله دن کيم ائدر رها، گئتمه
مريض- عشق اولانا نئيله سين طبيب- زمان
سوا-ي شهد- لبين يوخدو بير دوا، گئتمه
کمال- شؤقله قوي ائيله ييم خليل آسا
او خاک- مقدمينه جانيمي فدا، گئتمه
اگر فراقيني گؤرسم، گؤرن گؤزوم چيخسين
گؤزومده خاک- رهين عئين-توتيا، گئتمه
طواف- کويده سعييم نئجه اولور حاصيل؟
اونا کي، ذيکر- لبين وئرمه سه صفا، گئتمه؟
خزينه گؤهري تک اولماسان نهان گؤزدن
ووجودونو ائله ييب محض کيميا، گئتمه
رقيب طعنه سي، هيجران غمي اولور موشگول
بو ناتوانه گؤروب اونلاري روا، گئتمه
----- بو کیتابی یوءکلمک اوءچون تیکله ییین -----
سلام