شاعرین سسی ایله شعرلر - یئتیم عیوض (عیوض سیَزنلی)
شاعرین سسی ایله شعرلر - یئتیم عیوض (عیوض سیَزنلی)
بو شاعری نئجه تانیدیم؟
نئچه ایل بوندان اؤنجه، تبریزده یولداشلارین بیرینین موبایلیندا، بیر شعر ائشیتدیم. بیر قوجا کیشینین سسی ایله اوخونان شعر گؤزل بیر موزیک اوءستونده چوخ اوءرگیمه یاتدی:
یاغیش یاغیر،
یاز یاغیشی
یاغ آی یاغیش، یاغگینن سن، سنه احسن، سنه آلقیش،
یاغ آی یاغیش
. . .
بو شاعری تانیمیردیم. آمّا بو شعرینی چوخ سئویردیم. گوءنده نئچه سری قولاق آسیردیم. بیر مودّتدن سونرا ایستهدیم بو شاعری تانیییم. آمّا اینترنتده، تکجه اونون آدینی اؤیرنه بیلدیم. یاغیش شعرینی اینترنتده گزرکن، شعرین سون مصراعلاریندا یئتیم عیوض آدینی اوخویا بیلدیم.
نئچه ایلدن سونرا، یولداشلارین بیرینین الینده بیر نئچه شعر ائله بو شاعردن ائشیتدیم. چوخ سئویندیم. بونلاری آلدیم و دقّتله قولاق آسدیم. بوءتون شعرلریندن حس یاغیردی. اوءرگه یاتان سس ایله جانا سینان بیر موزیک ایله ائشیدنین روحونو جسمیندن چیخارتماق ایستهییردی بو قوجا شاعر:
من دونیادان کؤچ ائیلهییب گئدنده
ناله چکر او قایالار، او داشلار
بو دونیادان کؤچمگیمی بیلنده
غریبسهیر نئچه نئچه سیرداشلار . . .
باشقا یئرده دئییردی:
من بیر قایا اولوم، من بیر داغ اولوم
سن سینهم اوءستوندن اؤتن دومان، چن
من مئشه قوینوندا بیر بولاق اولوم
سنسه منیم حزین، شیرین زومزومهم
بیلیرسن او دمده نه ایستهییرم
بیر من اولوم، بیر سن... بیزه باشقا کیم لازیمدی گؤرهسن. . .
داها بو شاعرین شعرلرینی ائشیتمهمک ایستهمیردیم. ایستهدیم اینترنتده اولان بوءتون شعرلرینی یوءکلهییب قولاق آسام. چوخلو گزندن سونرا، بو شاعردن بیر آلبوم تاپدیم. آمّا تکجه اؤزوم ائشیتمگه یاخشی گؤردوم و بو فایللارین کئیفیّتی آشاغی اولدوغونا گؤره، اونلاری وبلاگدا یایماغا موناسب گؤرمهدیم.
یئنه بو ایشی داواملاتدیم. بیر مودّت بوندان قاباق، -باکو- سایتیندان بیر یاخشی کئیفیّتده آلبومونو یوءکلهدیم. تصمیم دوتدوم کی، بو فایللاری بورادا سیز عزیزلره تقدیم ائدم. اون آلتی تراکدان اون بئشینی سیز عزیزلره تقدیم ائدیرم. آمّا بونلاردان علاوه ده بو شاعردن چوخلو شعرلر وار. الینیزه گلسه بو شعرلر بیزی ده یاددان چیخاتمایین.
تأسّفلر کی، هله ده بو شاعری چوخ تانیمامیشام. تکجه بونو بیلمیشم کی، آدی عیوض سیَزنلی، سیَزن شهریندندی و تویلاردا شعر اوخویور. باشقا سؤزلر بو شاعردن بیلسنیز بیزه ده خبر وئرین. ساغ اولون.
شعریندن نمونه:
دونیادا ایکی شئی، باش آیاغی یوخ
بیریسی سوءفرهدی، بیریسی وطن
بونلارین حاقّیندا چوخ دئییلیب، چوخ
کیچیگی سوءفره دی، ایریسی وطن
حئیرانی اولما سن او ناکسلرین
حئیرانی اولگینن حزین سسلرین
اونسوزدا قارداشیم، سئون کسلرین
حوریسی، پریسی، سوناسی وطن
قاداسین آلارام سؤزو قانانین
ائل اوءچون چالیشیب، ائلچون یانانین
اونسوزدا بیلیرم هر بیر اوغلانین
اؤلوسو وطندیر، دیریسی وطن
کوءت اولان آلتی داشا چکیرلر
سوءرمهنی کیپریگه، قاشا چکیرلر
آنا ایله وطنی قوشا چکیرلر
بو یئتیم عیوضین آناسی وطن
دانلود:
لوءطف ائدین، هر یئرده بو فایللاری یوءکلمکده موشکول وارسا بیزه خبر وئرین.
سلام