دده قورقود كتابخاناسيندا ايشلنن املا قايدالاري – ي. ف.

 

دده قورقود كتابخاناسيندا ايشلنن املا قايدالاري – ي. ف.

 

سلام عزيز اوخوجولار

 

بیلدیگینیز کیمی دده قورقود کتابخاناسی، 1387-جی ایلین یاییندان pdf کتاب لاری اینترنتده یایماقلا ایشينه باشلامیشدیر. بو مودّتده من ائله یه بیلدیگیم قدر چالیشمیشام کی آذربایجان ادبیّاتیندان گؤزل اؤرنک لر سیزه تقدیم ائدم. آمّا بو یولدا چوخلو موشکول لر ایله قارشیلاشدیم. بونلارین بیری ده ایراندا آذربایجان دیلینی یازماق اوءچون قبول اولونموش قایدالارین اولماماغی دیر. آذربایجان دیلی نین بیر رسمی مؤسّسه سی اؤلکه میزده قورولمایینجا بو موشکولو آرادان آپارماق چتین نظره گلیر.

ائله بونا گؤره ده من چالیشدیم بو کتاب لاری یازدیقجا بو یازیلاری بیر سیستماتیک قایدالاردا یازماغا دا فکیرلشم. ایندی (1389-جو ایلین یاییندا) حسّ ائدیرم کی ائله یه بیلرم بو ایشی گؤرم و بو ایشی بو اومید ایله باشلاییرام کی عزیز اوخوجولار بونلاری اوخویوب و اؤز نظرلرینی دئسینلر کی، گله جکده اونلارین نظرلری اساسیندا بوندان دا موکمّل قایدالار ایله آذربایجانجا متن لری یازماغا چالیشاق.

بو کتاب دؤرد بؤلومده یازیلمیشدیر؛ «توءرکجه سؤزلر»، «شكيلچي لر» «خارجی سؤزلر (فارسجا و عربجه دن باشقا)»، «فارسجا و عربجه سؤزلر». هر بؤلومده کی قایدالاردا چالیشمیشیق کی، نئچه هدفه یئتیشک؛ اوّل یازماغین راحاتلیغی، ایکینجی موشکولسوز اوخوماغی، اوءچونجو فارس و عرب سؤزلرده اونلارین فارسجا املالاریندان امكاني اولان قدر فاصله توتماماق و آخیردا دا آذربایجان دیلینه مخصوص اولان قایدالاری بو املا ایله توضیح وئرمگی نین امکانینی نظرده آلمیشیق.

بو قایدالاری آماده ائتمکده نئچه کتاب لارین یازیلماسینا باخاراق و چوخلو یئرلرده دقّت ائدرک اونلاردان ان یاخشی نظره گلن قایدالاری سئچیب و بورادا گتیرمیشیک. بونلاردان علاوه اؤز نظرلریم ده تأثیرسیز اولمامیشدیر.

 

نظرلرینیزی دده قورقود کیتابخاناسیندا بیزه چاتدیرا بیلرسینیز.

ی. ف. 1389 – یای

 

بو كتابداكي قايدالار رسمي قايدالار كيمي قبول اولونماسا دا اوخوجولارا گؤره ياخشي ايدئالار وئره بيلر.

 

كتابين مشخّصاتي:

كتابين آدي: دده قورقود كتابخاناسيندا ايشلنن املا قايدالاري

يازيچي: ي. ف.

تاريخ: 1389- ياي

تايپ: ي. ف.

فورمت: PDF

سايز: ۲۶۳ کیلوبایت

صفحه لر تعدادي: ۳۸

 

 ----- يوءكلمك اوءچون تيكله -----

 

بو کتابداکی قایدالارین لازم اولان یئرده تکمیللشمه قایدالارینی ----- بورادا----- اوخویا بیلرسینیز.

شهريارين وفاتي نين ايل دؤنومو موناسبتينه

۲۷ شهريور، شهريارين وفاتي نين ايل دؤنومودور و ايراندا ملي شعر و ادب گوءنو آدلانير.

شهریارین هئیکلی - مقبره الشعرا - تبریز - قایناق: www.dunyam.turkblog.com

ائله بو موناسبته گؤره ده بير صوتي فايل يوءلكه مك اوءچون سيزه تقديم ائديرم. شهريار بورادا خاطره لريندن تعريفله يير. تعريفله يير كي نئجه شاعر اولدو... بو فايل تبيان سايتيندان يوءكلنيبدير...

... من ادبي ذؤقوم و بلكه ادبي حسّيم اوءچون آناما مديونام، آنام اؤزو يازيب اوخوماق ساوادي يوخو ايدي، ولي چون آتاسي علم و ادب اهلي ايدي، ادبياتدان چوخ شيرين شئي لر ازبرله ميشدي، توءركجه، فارسجا و عربجه چوخ لطيف شعرلر ياديندا ايدي و مخصوصا اؤزو بير لطافتلي شعر اوخوياندا اسيردي و گؤزلري نين ياشي آخيردي؛ ائله بونا گؤره ده وراثتدن علاوه اصلا آنامين بو حالي منيم روحوما شكيل وئردي ياديمدا دي ۴-۵ ياشيمدا اوّل حسّ ائتديگيم و ياديمدا ساخلاديغيم شعر، آنام اوخويان بو ايكي بئيت ايدي كي هله ده منيم مغزيمده سسي گلير و هله ده منجه دونيانين ان لطيف شعريدير:

گئتمه ترسا بالاسي من ده سنه سايه گليم

دامنيندن ياپيشيم من ده كليسايه گليم

يا كي سن گلگيلن اسلامي گوءلوم ائيله قبول

يا كي تعليم ائله من مذهب- عيسايه گليم

و ائله بو زاماندان منيم ادبي ذؤقومون جوشماغا باشلادي...

 

بونلار شهريارين فارسجا تعريف ائتديگي خاطره لرين بير قسمتي دير. تؤصيه ائديرم حتما قولاق آسين و الدن وئرمه يين.

 

فایلین آدی: شهریار - خاطره

فورمت: mp3

سايز: ۴.۰۷ مگابايت

اوزونلوق: ۴ دقيقه ۱۳ ثانيه

----- يوءكلمك اوءچون تيكله -----

 

بوندان قاباقجا اوستاددان وبلاگيميزدا بير كتاب ياييليبدير. حيدربابا و سهنديه پوئمالاري نين تكميل متن لري...

----- حيدربابا و سهنديه پوئمالاري نين صفحه لريني آچين -----

آذربايجان ديلينده بلاگ ياراد

بو گون بير يئني خبر وئرمك اوچون گلميشم.

 

آذربايجان ديلينده بلاگ ياراتماق اوچون بير يئني سايت ايسته سينيز، آرزو بلاگا باش وورونوز.

 

من كي، اورادا بير وبلاگ آچماق ايسته ييرم. سيزي بيلميرم...

 

www.arzublog.com

صمد وورغون؛ سئچيلميش شعرلري

 

صمد وورغون؛ سئچيلميش شعرلري

 

صمد وورغونون هئيكلي - باكي

 

«صمد يوسف اوغلو وكيلوو» 1906-جي ايل مارتين 21-ده قازاخ رايونونون يوخاري ساحلي كندينده بگ نسلينه منسوب بير عايله ده آنادان اولموشدور. وكيل آغالي لار، سونرالار ايسه وكيلوولار آدلانان نسلين 300 ايلليك تاريخي معلومدور. شاعرين آناسي دا همين نسيلدندير. وكيل آغالي لاردان چوخ جورأتلي حربچي لر، ماعارفچي لر، حكيم لر، شاعرلر يئتيشميشلر. شاعرين آتاسي يوسف آغا كندده، عؤمرونون سوْن ايل لريني ايسه قازاخدا ياشاميشدير. او، چوخ سخاوتلي اولدوغوندان اؤز وار-دؤلتيني الينده ساخلايا بيلمه ميش، يوخسوللاشميشدير.

بالاجا صمدين اوشاقليغي چوخ آجيناجاقلي اولموشدور. 6 ياشي اولاندا آناسي محبوب خانيم 28 ياشيندا وفات ائدير. صمد آتاسي يوسف آغانين و آنا ننه سي عايشه خانيمين حمايه سينده ياشايير. عايشه خانيمين اري - شاعرين باباسي مهدي خان آغا اؤز دؤرونده ائلينده، اوباسيندا كوهنسال لقبي ايله تانينان شاعر ايدي. گؤركملي آذربايجان شاعري، قاراباغ خاني ابراهيم خانين وزيري مولاّ پناه واقف (1719-1797) ده بو نسله منسوب اولموشدور.

شاعر اوشاقليق ايل لريني دوغما كندينده كئچيرميش، ايلك تحصيليني كند مكتبينده آلميشدير. 1918-جي ايلده گؤركملي ادبيّاتشوناس و ماعارفچي «فريدون بگ كؤچرلي» قوْري موعلّم لر سمينارياسي نين آذربايجان شؤعبه سيني قازاخا كؤچدوررك قازاخ موعلّم لر سمينارياسيني تشكيل ائدير. سميناريا موترقّي بير ماعارف اوجاغي ايدي. بو مكتبه قبول اولونان كند اوشاقلاري آراسيندا صمد و مهدي خان وكيلوو قارداش لاري دا وار ايديلر. فريدون بگ كؤچرلي نين حيات يولداشي بادصبا خانيم وكيلووا (كؤچرلي) شاعرين ياخين قوهومو ايدي.

سميناريادا او، ايلك شعرلريني قلمه آلير. بونلار خالق پوئزياسي فورماسيندان بيري اولان ليريك قوشمالار ايدي. يازديغي شعرلر سميناريانين ديوار قازتينده چيخيردي. سمينارياني بيتيرديكدن سونرا صمد وكيلوو آذربايجانين بير سيرا كند و رايون لاريندا، او جومله دن قازاخدا، قوبادا و گنجه ده آذربايجان ديلي و ادبيّاتيني تدريس ائتمگه باشلايير.

پوئزيا گئت-گئده شاعرين بوءتون وارليغينا حاكم كسيلير. گنج شاعر اؤز خالقيني، وطنيني، دوغما تورپاغي نين اسرار انگيز طبيعتيني سئوديگي اوءچون «وورغون» تخلّوصونو گؤتورور. او، اؤزو سونرالار بئله يازير:

عاشقم انسانا و طبيعته

اليم قلم توتوب يازاندان بري...

1956-جي ايلين مارت آييندا صمد وورغونون 50 ياشي تامام اولور. آذربايجان خالقي شاعر يوبيلئيي نين كئچيريلمه سينه حاضيرلاشير. آذربايجانين رهبرليگي طرفيندن «آذربايجان خالق شاعري» آدي تأسيس ائديلير و ايلك دفعه بو آدا صمد وورغون لايق گؤرونور. ماي آيي نين 12-ده اورا و بالِت تئاتريندا س.س.ر.اي- نين ادبي اجتماعيّتي نين و خارجي قوناق لارين اشتراكي ايله شاعرين طنطنه لي يوبيلئي گئجه سي كئچيريلير. يوبيلئي طنطنه سيندن ايكي هفته سونرا 1956-جي ايل ماي آيي نين 27-ده، ساعات 19:30-دا شاعرين گؤزلري ابدي يومولور. آمانسيز اؤلوم، شاعرين حيات عشقيله چيرپينان اوءرگيني، ياراديجيليق آتشي ايله اودلانان قلبيني ابدي سوسدورور.

 

بو متن آلتداكي قايناقدا اولان اولو شاعريميزين بيوقرافي نين بير پارچاسي ايدي. بو متني تام شكيلده اوخوماق اوءچون قايناق متنه موراجعه ائده بيلرسينيز.

 

قايناق: صمد وورغون، آذربايجان خالق شاعري نين رسمي وب سايتي؛

www.samedvurgun.com

 

كتابين موشخصاتي:

كتابين آدي: صمد وورغون، سئچيلميش شعرلر

تايپ: ي. ف.

فورمت: PDF

صفحه لر تعدادي: 37

سايز: 328 كيلوبايت

 

 

شاعر نه تئز قوجالدین سن!

 

بولبول اولوب دوءشدوم باغا
ناله چکدیم سولا، ساغا
سسیم دوءشدو مین بوداغا
سوسدو چمن، دیندی گوءلشن:
شاعر نه تئز قوجالدین سن!

کؤنول وئردیم مین آخشاما
پروانه تک یاندیم شامعا
گؤزوندن یاش داما-داما
شامع دا دیله گلدی بیردن:
شاعر نه تئز قوجالدین سن!

مجلس لره دوءشدو یولوم
گنجلیک اولدو ساغیم، سولوم
دئدیم یاتیب راحات اولوم
سوال قوپدو هر اوءرکدن:
شاعر نه تئز قوجالدین سن!

توفنگ آلیب چیخدیم اووا
دوغدو گوءنش، گوءلدو هاوا
جئیران لاری قووا-قووا
جاواب گلدی گوللـه لردن:
شاعر نه تئز قوجالدین سن!

کنده گئتدیم، بیر آغ بیرچک
قوجاقلادی منی گؤرجک
او آغلادی بیر آنا تک
دئدی: کاش کی، اؤلَیدیم من
شاعر نه تئز قوجالدین سن!

غریبه دیر: اوءزو عارسیز
شاختا قلبی ایلک باهارسیز
عشقی سؤزو اعتبارسیز
«دوستلاریم» دا دئییر بعضاً:
شاعر نه تئز قوجالدین سن!

ویران کؤنلوم واراق-واراق
اسدی خزان، دوءشدو یارپاق
آنا وطن، آنا تورپاق
بیر آه چکدی سینه سیندن:
شاعر نه تئز قوجالدین سن!

پولاد سینه م، دؤز بو درده
گوءنش باتماز ایلک سحرده
انسان اوغلو ابلیس لر ده
باخیب منه دئییر قصداً:
شاعر، نه تئز قوجالدین سن!

قارتال اولوب قاناد آچدیم
زامان لاری کئچیب آشدیم
انسان لاردان اوزاقلاشدیم
صدا گلدی یئرله گؤیدن:
شاعر نه تئز قوجالدین سن!

1944، 10 نویابر

 

 ----- يوكله مك اوچون تيكله -----

 

آمريكادا قورآنا اهانت بوتون موسلمان لارا اهانت دير.

 

 

آمريكادا قورآنا اهانت بوتون موسلمان لارا اهانت دير.

 

۱. تبيان سايتيندا اوخو

۲. تبيان سايتيندا اوخو

۳. تبيان سايتيندا اوخو

۴. آذربايجان اسلام خبرينده اوخو

۵. آذربايجان اسلام خبرينده اوخو

 

 

دده قورقود كتابخاناسي ايكي ايلليك اولدو.

سلام عزيز اوخوجولار

 

دده قورقود كتابخاناسي ايكي ايلليك اولدو.

 

دده قورقود كتابخاناسي 1387-جي ايلين شهريوري نين 16-سينده تورك ديلينده كتاب لاري يايماق هدفي ايله ايشينه باشلادي. بورايا كيمي عزيز يولداش لارا گؤره ايگيرمي دن آرتيق عونوانلي كتاب لار تقديم ائديب. بو كتاب لار ايكينجي ايلين عرضينده 1870 دفعه دن آرتيق دانلود اولونوب. بو تعداد بيرينجي ايله باخاراق (630 دفعه دانلود) چوخ اوءستونلشيبدير (تقريبا 3 برابر). ان چوخ دانلود اولونان كتاب لار بونلاردان عبارتدير:

1)     صايب تبريزي دن 70 شعر (427 دانلود)

2)     فضولي دن 70 شعر – ايكينجي بؤلوم (396 دانلود)

3)     الفباميز – رحيم رييس نيا (259 دانلود)

 

ايكينجي ايليميزده يوكله ديگيميز كتاب لار بونلاردان عبارتديلر:

 

01)     حیدربابا و سهندیّه؛ سئید محمّد حسین بهجت (شهریار)؛

02)     ایشغال اولونموش رایونلار

03)     جنوبی آذربایجاندا آنا دیلینده اثرلرین چاپ و نشر تاریخی؛ دوکتور حسن جوادی، ابوالفضل بهادوری؛

04)     الفبامیز؛ رحیم رییس نیا؛

05)     خورشیدبانو ناتوان شعرلری؛ خورشید بانو ناتوان؛

06)     آیاق قابی؛ ائلچین افندیئو؛

07)     مولاّ ولی ودادی؛ شعرلری

08)     گوءلوستان و توءرکمن چای موقاویله لری نین متنی

09)     گولوستان پوئماسی و نئچه سئچیلمیش شعر؛ بختیار وهابزاده

 

 

بيرينجي ايلين كتاب لاري نين ليستي ني بورادا گؤره بيلرسينيز.

 

بو كتاب لار و بيرينجي ايلده يوكله ديگيميز كتاب لاري اوخوماق اوچون بورایا تيكله يين.

 

بو كتاب لاردان علاوه ايندي «صمد وورغون دان سئچيلميش شعرلر» و «دده قورقود كتابخاناسيندا ايشلنن املا قايدالاري» آماده اولوب كي تئزليكجه سيز عزيز لره تقديم اولوناجاق.

گولوستان پوئماسی و سئچیلمیش شعرلر - بختیار وهابزاده

 

گولوستان پوئماسی و سئچیلمیش شعرلر - بختیار وهابزاده

 

بختیار محمود اوغلو وهابزاده 1925-جی ایلده شکی شهرینده آنادان اولموشدو. 1934-جو ایلده عایله سی ایله برابر باکیا کؤچن شاعر 1942-جی ایلده اورتا مکتبی بیتیریب، باکی دؤلت اونیوِرسیته سی نین فیلولوگیا فاکولته سینه داخل اولموش، 1947-جی ایلده همین فاکولته نی بیتیریب، 1951-ده فیلولوژی علم لر دوکتورو عالملیک درجه سینی آلمیشدیر.

بختیار بدیعی یارادیجیلیغا ایکینجی دونیا موحاربه سی ایل لرینده باشلامیش، 1945-جی ایلده یازیچی لار اتفّاقی نین عوءضولوگونه قبول اولونموشدور. بدیعی یارادیجیلیقلا یاناشی، 1940-جی ایلدن 1990-جی ایله قدر اونیورسیته ده درس دئمیشدیر. 1980-جی ایلده آذربایجان علم لر آکادمیاسی نین موخبر عوءضوو سئچیلمیشدیر.

وهابزاده 70-دن آرتیق شعر کتابی، 2 مونوقرافیا، 11 علمی پوبلیسیست کتاب و یوءزلرله مقاله نین مؤلّفی دیر.

باکی آکادمیک دؤلت درام تئاتری نین صحنه سینده اونون «وجدان»، «ایکینجی سس»، «یاغیشدان سونرا»، «اؤزوموزو کسن قیلینج»، «جزاسیز گوناه» و «دار آغاجی» پیئس لری تاماشایا قویولموشدور. او، تاریخی و موعاصیر مؤضوعدا 20-دن آرتیق ایری حجملی پوئمانین مؤلّفی دیر.

1974-جو ایلده «امکدار اینجه صنعت» خادمی، 1985-جی ایلده ایسه اونا «خالق شاعری» آدی وئریلمیشدیر. بختیارین بوءتون اثرلرینده دونیایا فلسفی باخیش اساس یئر توتور. آذربایجان ادبیّاتی نین، بوءتؤولوکده آذربایجان ادبی فیکری نین گؤرکملی تمثیلچی سی اولان خالق شاعری بختیار وهابزاده نین آدی تکجه آذربایجان جمهوریّتینده دئییل، اونون حدودلاریندان چوخ-چوخ اوزاق لاردا تانینیر و اثرلری بیر چوخ دیل لره ترجومه اولموشدور.

بختیار وهابزاده 2009-جو ایلین فِورال آیی نین 13-ده 84 یاشیندا دونیاسینی دگیشدی و فخری خیابانیندا دفن اولوندو.

 

بو متن آلتداکی قایناقدان سئچیلمیشدیر:

بختیار وهابزاده، آخی دونیا فیرلانیر، حاضیرلایان: سعید موغانلی، 1388، کرج، پینار یایین ائوی

 

بختیار وهابزاده نین شعرلرینی چوخداندیر کی وبلاگدا تقدیم ائتمک ایستیرم. ایندی بو ایشی گؤرمک ایستیرم.

 

کتابین موشخصاتی:

کتابین آدی: گولوستان پوئماسی و نئچه سئچیلمیش شعر

شاعر: بختیار وهابزاده

تایپ: ی. ف.

فورمت: PDF

صفحه لر تعدادي: ۷۶

سايز: ۱ مگابايت

 

بوندان قاباقجا بو شاعردن آنا ديلي آديندا بير شعر وبلاگدا يازميشام. بو شعري ده بو بؤيوك شاعردن اوخويون:

 

سنین دیلیندن

 

ایل لرله بیر عشقین جؤرونو چکدیک
آیریلساق، گوءن سؤنر، ایل قینار بیزی
ائنیش- یوخوشونو بیر اؤتدوگوموز
یول لارا نه دئیَک، یول قینار بیزی

سن دئدین، باشلانان قورتارسین گرک
من دئدیم، دویماییر آرزودان اوءرک
بیرگه اکدیگیمیز گوءلو درمه سک
تیکان لار ال چالار، گوءل قینار بیزی

بس دئییل بو الم، بو کدر منه
ائله دین دونیانی سن هدر منه
گؤزل سؤزلر دئدین نه قدر منه
گل ایندی دانلاما، دیل قینار بیزی

چوخ چکه بیلمه دیک نازینی عشقین
قیش گلیب، یاشادیق یازینی عشقین
یامانجا سیندیردیق سازینی عشقین
بیلمه دیک، آخیردا تئل قینار بیزی

دئدین کی، عشقیمله بختیارام من
دئدین کی، دؤنمرم قلبین سسیندن
ایندیسه چکینیب ائل طعنه سیندن
دئییرسن، عاییبدیر، ائل قینار بیزی

ایول، 1967

 

----- كتابي يوكلمك اوءچون تيكله يين -----  * یئنی لینک*