سئچیلمیش اثرلر - یاسر فاتحی

 

سئچیلمیش اثرلر - یاسر فاتحی

سلام عزیز اوخوجولار

بو دفعه اؤز شعرلریمدن نمونه اوءچون اون شعر سئچیب و بیر کتاب قالبینده سیزه تقدیم ائتمک اوءچون وبلاگدا یئرلشدیردیم.

البته دقّت بویورون کی بو کتاب لاتین الفباسیندا تایپ اولونوب.

IMG_5422.jpg

 

Kitabın müşəxxəsatı:

Kitabın adı: Seçilmiş əsərlər - 10 şer

Şair: Yasir Fatehi

Formət: PDF

Sayz: 331 kb

Səfhələr tedadı: 21

 

Şerlərdən bir nümunə

 

Gözümdə Şək Çəkərəm

 

Həmişə dəftərimə bir sınıq ürək çəkərəm

Öz əksimi sən ilən yox gözəl ki tək çəkərəm

Mənim sınıq ürəyim açmamış solub çürüdü

Onunçün heç yerə gül yox solan çiçək çəkərəm

Əl açmaram sənə bundn belə məhəbbət üçün

Nə əl bu dəftərə çəkdim nə bir ətək çəkərəm

Ged, Allahın amanında gülüm, qayıtma daha

Nə zülm edərsən elə, bil ki ey mələk, çəkərəm

Desən ki şəklimi çək, bir qara midad götürüb

Bütün üzün yerinə bir qara bəzək çəkərəm

Qan ağladım gecə-gündüz gülən zaman mənə sən

Gözümdə bir qara qan, qanlı bir bəbək çəkərəm

Bu hal ilə yenə ey gül, desən ki öl, ölərəm

Desən yaşa bu ömür yüklərin də çək, çəkərəm

Mənə deyirlər oğul, rəsmə çək məhəbbət evin

Öz əksimi salaram mən, gözümdə şək çəkərəm

 

1390/8/20

 

yükləmək üçün tikləyin - یوءکله‏مک اوءچون تیکله‏یین

 

درمانی وئر - علیرضا سلطانی

 

درمانی وئر - علیرضا سلطانی

 

trau2um1xxj2xk8om9vt.jpg

 

علیرضا سلطانی گرمی، ۱۳۴۸-جی گوءنش ایلینده گرمی شهرینده موتوسّط بیر عایله‏ده آنادان اولدو. بؤیودوکجه پیئس (نمایشنامه) یازماسینا علاقه‏لی اولموشدور. سربازلیق خدمتی دؤرونده ایلک نمایشنامه‏سینی یازمیشدیر. نمایش‏لرین بیری‏نین اجراسیندا اولان موسیقی اونو بو هؤنره ساری چکدی و بو هؤنر اؤزو اؤز نؤبه‏سینده علیرضا سلطانی‏نی شعره طرف چکدی. ایندی ایسه (بزکلی خلقت) آدیندا کتابی عزیز آذربایجان دیللی هموطن‏لره تقدیم اولونوبدور.

 

آلتداکی شعر بو کتابدان عزیز اوخوجولارا تقدیم اولونوبدور.

 

r46ym82wsc88q6mkyrxk.jpg

 

 دردمند- عشقینم درمانی وئر درمانی وئر

حاضرم جاندان کئچم فرمانی وئر فرمانی وئر

گؤزله‏ییر گؤزلر سنی حددن آشیب ظوءلم و ستم

بو یانان دونیایا سن سامانی وئر سامانی وئر

هر اسن باد صبا غملی سیزیلدیر نئی کیمی

بو آخان گؤز یاشینه پایانی وئر پایانی وئر

رام اولوب دریا سویو اصلاً دانیشمیر باد ایلن

بو یاتان دریایه سن طوفانی وئر طوفانی وئر

تؤکمه‏ییر سوبحان یاغیش گوءل‏لر آچا گوءلخانه‏ده

بو سولان گوءلخانه‏یه بارانی وئر بارانی وئر

قویما بو گوءلخانه‏نین عطری گئده ویلان اولا

بو اولان ویرانه‏یه امکانی وئر امکانی وئر

آغلاییر شام‏لار یاناندا بال و پر پروانه‏سی

بو یانان بال و پره جریانی وئر جریانی وئر

هر شیاطین زور ایلن ییخمیش کناره مظلومو

ظوءلم ائدن شئیطان‏لارا زندانی وئر زندانی وئر

قان سوران انسان‏لارا ثروت اولوبدور آبرو

سن گؤتور بو ثروتی ایمانی وئر ایمانی وئر

تیر حق‏لن وئرگینن وجدان‏سیز او اهریمنه

تا چکه ملّت نفس انسانی وئر انسانی وئر

  

علیرضا سلطانی‏دن بو گؤزل شعرینی بیزه وئرمکدن و بیزه بو شعری وبلاگا قویماق اجازه‏سی وئرمک اوچون تشکّور ائدیریک.

 

عکس - نماز

 

عکس - نماز

 

tsne5etww7lvnakffm84.jpg

 

بو عکسه تؤضیح لازیم دئییل. تکجه بونا گؤره بورا قویموشام کی، بیر عدّه‏میز اؤزوموزو بو آغا ایله موقایسه ائدک و اؤز موسلمانلیغیمیزدان اوتاناق...

 

قوربان بایرامی موبارک.

 

غزل - حیران خانیم

 

غزل - حیران خانیم

 

۱۹-جو عصرین گؤرکملی تانینمیش آذربایجان شاعره‏سی حیران خانیم کلاسیک شعرین انکشافیندا مؤهوم رول اوینامیش سؤز اوستالاریندان بیری‏دیر. آذربایجان و فارس دیلینده لیریک شعرین بوءتون نؤع‏لرینده یازیب- یاراتمیش شاعره اؤز یارادیجیلیغیندا دؤرونون اجتماعی حادثه‏لرینه ده بیگانه قالمامیشدیر. حیران خانیمین غزل‏لرینده ایستر سئوگی موناسبت‏لری، ایستر ده حیات معیشت لؤحه‏لری‏نین تصویری اؤز رئال‏لیغی ایله سئچیلیر.

 

 

عشق- روخ- جانان گئنه طوغیان ائله‏ییبدیر

قلبیم اودونو آتش- سوزان ائله‏ییبدیر

خورشید- کسوف ایدی و یا طورّه‏ی- شب‏رنگ

روخسارینا دلدار پریشان ائله‏ییبدیر

یاقوت- لب- یار دوءر افشان اولوبدور

یا باد- صبا غونچه‏نی خندان ائله‏ییبدیر

اول چهره‏ی- گوءل‏رنگ ایدی یا لوءطف ایله خالق

مشرقدن ایکی صوءبح نومایان ائله‏ییبدیر

بعضی‏لره بو چرخ قیلیب مسندی قسمت

منزل بیز اوءچون کوه و بیابان ائله‏ییبدیر

فرقت ستمیندن قدیمیز داله دؤنوبدور

هجران المی باغریمیزی قان ائله‏ییبدیر

اول ماه مگر تعزیه حیرانا توتوبدور

طورّه‏سین آچیب زوءلفی پریشان ائله‏ییبدیر

 

قایناق: حیران خانیم؛ سئچیلمیش اثرلری؛ شرق- غرب ؛ باکی - ۲۰۰۶

 

حدیث- اربعین ؛ مولاّ محمّد فضولی

 

حدیث- اربعین ؛ مولاّ محمّد فضولی

 

Fuzuli_Divan.jpg

 

حدیث- اربعین مولاّ محمّد فضولی‏نین اثرلریندندیر. فضولی بو اثرده مولانا عبدالرحمن جامی فارسجایا ترجومه ائدن قیرخ حدیثی توءرکجه‏یه ترجومه ائتمیشدیر. اثرین اوّلینده بیر موقدّمه یازمیشدیر کی بیز موقدّمه‏دن کئچیب و قیرخ حدیثین توءرکجه منظوم ترجومه‏سینی سیزه تقدیم ائدیریک.

بوندان اوّل فضولی‏دن ایکی جلد شعر توپلوسو دده قورقود کتابخاناسیندا یاییلمیشدیر. بو کتاب‏لارین هر بیری‏سینده 70 غزل بو اولو شاعرین دیوانیندان سئچیلیب و عزیز اوخوجولارا تقدیم اولونوبدور. کتاب‏لاری بو لینک‏لردن یوءکله‏یه بیلرسینیز:

جنون پیرایه‏سی (بیرینجی توپلو) :

http://dqk.blogfa.com/post-2.aspx

اینانارمی، اینانمازمی؛ (ایکینجی توپلو) :

http://dqk.blogfa.com/post-20.aspx

دقّت بویورون کی، بو کتاب و بوءتون کتاب‏لاریمیزدا املا اشکال‏لاری احتمالی واردیر و بونا گؤره عزیز اوخوجولاردان عوءذر ایسته‏ییرم.

کتابین موشخّصاتی:

کتابین آدی: حدیث- اربعین

شاعر: مولاّ محمّد فضولی

صفحه‏لر تعدادی: ۱۰

سایز: ۶۴۴ کیلوبایت

فورمت: PDF

کتابدان بیر پارچا:

15)

ائی کی، هر مجلس ایچره محرم‏سن
سنده مجلس سؤزو امانتدیر
ائتمه افشای- راز- هر مجلس
کی، بو سیرت بؤیوک خیانتدیر

19)

اول دئییلدیر غنی کی، یئتمیش اولا
مال ایله بیر مقام- اعلایه
غنی اولدور کی، موطلقا نفسی
التفات ائتمه‏یه بو دونیایا

29)

نئجه واعظدن التماس ائده‏سن
کی، وئره پند- سودمند سانا
مؤت- احباب و انقلاب- زامان
دم‏به‏دم بس دئگیل‏می پند سانا؟

 

-----کتابی یوءکله‏مک اوءچون تیکله‏یین-----