دده قورقود کتابخاناسی

<<                              فضولی‏نین شعرلری‏نین لیستی                              >>

منی ذکر ائتمز ائل، افسانه‏ی- مجنونا مایلدیر

نه بنزر اول منه، دردی اونون درمانه قابلدیر

بیابان‏لاردا مجنوندان غم و دردیم سوال ائتمین

نه بیلسین بحر حالین اول کی، منزلگاهی ساحلدیر

منیم تک اولا بیلمز شؤهره‏ی- شهر- بلا مجنون

قبول ائیلرمی بو روسوالیغی هر کیم کی، عاقلدیر

نه موشکل حالی اولسا عاشقین معشوق ائدر چاره

گر اول بی‏درد بیلمزسه بو حالی، حال موشکلدیر

فراق ایّامی سئیلاب- سرشکیمدن خبر توتماز

قیامت ماجراسیندان گؤر، اول ظالم نه غافلدیر

فقیه- مدرسه معذوردور انکار- عشق ائتسه

یوخ اؤزگه علمینه انکاریمیز، بو علمه جاهلدیر

فضولی، ائل سنی مجنوندان افزون دئر ملامتده

بونا مونکر دئگیل، مجنون دخی معقوله قایلدیر

*  *  *

اول پری‏وش کیم، ملاحت مولکونون سولطانی‏دیر

حؤکم اونون حؤکمودورور، فرمان اونون فرمانی‏دیر

سوءردو مجنون نؤبتین، ایندی منم روسوای- عشق

دوغرو دئرلر: هر زامان بیر عاشقین دؤرانی‏دیر

لحظه- لحظه کؤنلوم اودوندان شررلردیر چیخان

قطره- قطره گؤز تؤکن سانمین سرشکیم قانی‏دیر

چاک‏لر جسمیمده تیغ- عشقدن عئیب ائتمه‏ییز

کیم، جنون گوءلزاری‏نین بونلار گوءل- خندانی‏دیر

ائی فضولی، اولا کیم رحم ائده یار افغانینه

آغلاگیل زار، اونجا کیم، زار آغلاماق امکانی‏دیر

*  *  *

منیم کیم، بیر لب- خندان اوءچون گریانلیغیم واردیر

پریشان طوءرّه‏لر دؤرونده سرگردانلیغیم واردیر

یاشیم تخت- رواندیر، تاج- زرّین شؤعله‏ی- آهیم

گؤرون کیم، دؤلت- عشق ایله نه سولطانلیغیم واردیر؟

یومولماز اشک طوغیانیندان آنسیز چشم- خونباریم

خیال- صورت- جانانه خوش حئیرانلیغیم واردیر

سرشکیم گؤر، منی، ائی ابر، اؤزوندن کم خیال ائتمه

هوای- عشق ایله مین سنجه اشک افشانلیغیم واردیر

لبین دؤرونده کیم، انسان اولان جان دئر اونا موطلق

اگر آب- حیات ائتسم طلب، حئیوانلیغیم واردیر

فضولی جام- مئی ترکین قیلیب، زؤهد ایله تقوادن

قامو دانایه رؤشندیر بو، کیم، نادانلیغیم واردیر

*  *  *

ذؤق شؤق ایله جهان قئیدین چکن زحمت چکر

اهل- ذؤق اولدور کیم، اوندان دامن- همّت چکر

گوءن چکر یئردن گؤگه هر دم غوبار- راهی‏نی

توتیا ایچون، بلی، یئردن گؤگه منّت چکر

ائی چکن غئیر ایله پنهان بزم ائدیب مئی گاه- گاه

یاد قیل اوندان کی، بزمین یاد ائدیب حسرت چکر

خالی ائتمیش غئیردن زوءلفون خیالی کؤنلومو

نولا صاحب‏کشف ایله بیر عؤمردور خلوت چکر

چک، صبوحی، صوءبح نقّاشینه عرض- عارض ائت

بؤیله چکسین، کیم فلک لؤحینه بیر صورت چکر

سروقامتلر سمن‏روخسارلر تورپاغی‏دیر

هر صنم کیم، آچیلیر، هر سرو کیم، قامت چکر

قطره‏ی- اشکیم قطاری، سینه چاکیندن گیریب

تن ائوینه دیشرادان بار- غم و محنت چکر

ائی فضولی، باخمایام تا غئیره، هر خونین موژه

آتشین بیر میلدیر کیم، چشمیمه غئیرت چکر

*  *  *

هر کتابه کیم، لب- لعلین حدیثی یازه‏لر

رشته‏ی- جان بیرله ذؤق اهلی اونو شیرازه‏لر

بو نه سِردیر، سرّ- عشقین دئمه‏دن بیر کیمسه‏یه

شهره دوءشموش «من سنی سئودیم» دئین آوازه‏لر

شئیخ‏لر مئیخانه‏دن اوءز دؤندررلر مسجده

بی‏طریقت‏لر گرک کیم، دوغرو یولدان آزه‏لر

چاک‏لر گؤکسومده، سانمین کیم، آچیبدیر تیغ- عشق

کؤنلومون شهرینه مهرین گیرمگه دروازه‏لر

ائی فضولی، یار اگر جؤر ائتسه، اوندان اینجیمه

یار جؤرون عاشقه هر دم محبّت تازه‏لر

*  *  *

سئیر قیل، گؤر کیم، گوءلوستانین نه آب و تابی وار

هر طرف مین سرو- سرسبز و گوءل- سیرابی وار

پنجه‏ی- برگ- چنار ائتمیش موهیّا شانه‏لر

آنلامیش گویا کی، سوءنبول کاکلی‏نین تابی وار

راحت ایچون فرش سالمیش سبزه‏ی- تر گوءلشنه

نرگسین گؤرموش گؤزون مخمور، سانمیش خوابی وار

بولونور هر درده ایسترسن، گوءلوستاندا دوا

حؤقّه‏سینده غؤنچه‏نین گویا صفا جولاّبی وار

گوءلدو گوءل، آچیلدی نرگس، لاله دولدو ژاله‏دن

ائی خوش اول کیم، عشرت و عئیش ائتمگه اسبابی وار

غالب اولموش خلقه ذؤق- سئیر- گوءلشن، گوییا

چکمگه خلق بنفشه زوءلفونون قولاّبی وار

گر فضولی مئیل- گوءلزار ائتسه فصل- گوءل، نولا

عئیش اوءچون خونابه‏ی- دلدن شراب- نابی وار

*  *  *

سرو- آزاد قدین ایله مانا یئکسان گؤرونور

نه‏یه سرگشته اولان باخسا، خورامان گؤرونور

جان گؤرونمز دئسه‏لر تنده اینانمان، نیشه کیم

لوءطفدن هر نئجه باخسام تنینه، جان گؤرونور

دئرم احوالیمی جانانه قیلام عرض، ولی

گؤره بیلمن اؤزومو اوندا کی، جانان گؤرونور

ائی دئین: صبر قیل، آه ائیله‏مه یاری گؤرجک

منه دوشواردیر اول، گر سنه آسان گؤرونور

سوردوم احوالیمی عشقینده مونجّم‏لردن

باخدیلار طالع ائوینه دئدیلر: قان گؤرونور

نه کماندارسان، ائی مه، کی، آتیب غمزه اوخون

ییخدیغین صئیدده نه زخم، نه پئیکان گؤرونور

بیر صنم زوءلفونه گویا کی، وئریبدیر کؤنلون

کی، فضولی‏نین ایکن حالی پریشان گؤرونور

*  *  *

سلوک- فقر اطواریم، مزاق- عشق حالیمدیر

تجرّود عالمی سئیرینده عالم پایمالیمدیر

خیالیمدا بودور کیم، بولموشام عالمده بیر خلقت

نه عالم، قانغی خلقت، ساندیغیم باطل خیالیمدیر

جنون فئیضی‏له آزاد اولموشام قئید- علایقدن

کمال و فضل ترکی، روتبه‏ی- فضل و کمالیمدیر

منم شمع- وصاله یاندیران پروانه‏وش وارین

فنای- موطلقیم جانان ایله بزم- وصالیمدیر

طبیبا قیلمیشام تشخیص، درد- عشقدیر دردیم

علامت آه- سرد و روی- زرد و اشک- آلیمدیر

هوادن مؤجه گلمیش بحر- دردم، شاهد- حالیم

دل- پور اضطراب و ناله‏ی- بی اعتدالیمدیر

فضولی، عالم- فقر و فناده مونعم- وقتم

دیار- مسکنت، نقد- قناعت موءلک و مالیمدیر

*  *  *

صفای- وصل قدرین هجر ایله بیمار اولاندان سور

زولال- ذؤق شؤقون تشنه‏ی- دیدار اولاندان سور

لبین سرّین گلیب گؤفتاره، مندن اؤزگه‏دن سورما

بو پنهان نوکته‏نی بیر واقف- اسرار اولاندان سور

گؤزو یاش‏لی‏لارین حالین نه بیلسین مردوم- غافل

کواکب سئیری‏نی شب تا سحر بیدار اولاندان سور

خبرسیز اولما فتّان گؤزلرین جؤرون چکن‏لردن

خبرسیز مست‏لر بیدادی‏نی هوشیار اولاندان سور

غمیندن شمع تک یاندیم، صبادن سورما احوالیم

بو احوالی شب- هجران منیم‏له یار اولاندان سور

خراب- جام- عشقم، نرگس- مستین بیلیر حالیم

خرابات اهلی‏نین حالی‏نی بیر خومّار اولاندان سور

محبّت لذّتیندن بی‏خبردیر زاهد- غافل

فضولی، عشق ذؤقون، ذؤق- عشقی وار اولاندان سور

*  *  *

خم آچیلدیقجا زوءلفوندن بلا و محنتیم آرتار

بحمدالله کی، عؤمروم اوزانار، جمعیّتیم آرتار

دئمن^[1] اکسیک منی تدریج ایله یاقوت اولان داشدان

بویاندیقجا جگر قانی‏له قدر و قیمتیم آرتار

توتا گؤر گؤز یولون، ائی اشک، کیم، تمکینیم اسکیکدیر

بو صورتخانه‏نین گؤردوکجه نقشین حئیرتیم آرتار

مریض- درد- عشقم، ترک- عالمدیر مورادیم کیم،

بو ناخوش موءلکده اگلندیگیم‏جه زحمتیم آرتار

بوءکولدو قامتیم حسرت یوءکوندن، وه کی، عالمده

اوءمیدیم اکسیلیب هر لحظه یوءز مین، حسرتیم آرتار

نه شربتدیر غمین کیم، ایچدیگیم‏جه اکسیلیر صبریم

نه سحر ائیلر روخون کیم، باخدیغیم‏جا رغبتیم آرتار

چوخ اولدوقجا غم و دردیم ره- عشق ایچره خوشحالم

فضولی، شاد اولوب شوءکر ائتمه‏ییم‏می، نعمتیم آرتار

^[1]  دئمه‏یین

<<                              فضولی‏نین شعرلری‏نین لیستی                              >>